太子小食店｜王宗堯情侶檔開食店主打刈包推介素魷魚 + 慢煮雞

刈包近年人氣急升飛上枝頭，連藝人王宗堯最近夥拍女友Julia於太子新開的小食店「Happy Belly」也以刈包為主角，兼賣兩位的心頭好小食及咖啡特飲。

文、圖： CC

暫時以四款刈包為主食，另有雞翼，薯條等小食，值得留意是餐牌上的食物小畫都是王宗堯手筆，簡潔可愛。

**麻辣慢煮雞刈包 $**40
麻辣醬以花椒、白芝麻等慢煮而成，不算太濃，少少刺激惹味，雞胸juicy不乾身，伴青瓜剛好平衡一下。

心水小店結業萌生開舖念頭

宗堯說開小食店的想法，其實早於一年多前已有：「多年前喺台灣工作，落機後身一餐就係食刈包，當時間唔中就去食，慢慢就鍾意咗。至於一年前有呢個諗法時，當時本身唔係想賣而家賣嘅食物，後來一邊諗一邊改，好多嘢都係機緣底下促成。」今次開店的最大契機，是因為「以前同朋友好鍾意去一間小店食宵夜，好鍾意食佢哋嘅刈包，個包身好食到連女朋友隻貓都鍾意食。後來因為種種原因，小店無做，我哋有諗過合作，但最後索性不如接手自己學做。」

**游°特製馬德里魷魚刈包（素） $**46
與荃灣素食餐廳「游°」合作，炸脆雞髀菇扮魷魚圈，醬汁以紅椒粉、茄膏、紅辣椒片及紅酒醋低溫煮成，酸酸甜甜。

**芝士吉列蠔刈包 $**44
兩隻香脆炸蠔啖啖肉，配芝士，蔬菜連醬汁，飽肚不膩。

推介口味素魷魚 + 慢煮雞

雖不是刈包專門店，但暫時以刈包為主食，另配薯條，雞翼等。刈包款式最多，共四款包括：芝士吉列蠔、麻辣慢煮雞、台式滷肉片及馬德裡魷魚刈包（素）。宗堯笑言最想推介麻辣慢煮雞，因為「Julia 好鍾意食慢煮雞，就算餐廳menu上有好多選擇，最後佢都一定要揀慢煮雞。」一條條蘸滿麻辣汁的雞胸肉把包身塞得滿滿，雞肉腍滑，少辣惹味又健康。還有刈包中唯一一款素食款式，找來荃灣素食餐廳「游°」合作炮製，香炸後的雞髀菇圈成魷魚圈，裹上麵包糠及粉漿，脆炸後模仿魷魚口感，醬料是亮點，靈感來自西班牙馬德里一款醬料，再自家調製，香滑有層次。

**手拍青瓜咖啡湯力 $**48
湯力水加espresso及七喜，加手拍青瓜味更refreshing。

與品牌＂Pedestrian Coffee＂合作推出自家烘焙咖啡豆，味偏nutty帶焦糖香。

目標維持每日食物水準

刈包食譜向心水小店取經，飲品又有專門同事把關。開店最花功夫的，王宗堯說是「搵到菜式配方，做好佢，只係第一步。最難係要每日都維持同一個水準，背後係唔少心機。」加上「始終係生意，一定要收支平衡，但我自問唔係好叻管數嘅人，呢方面就要靠Julia幫手。」市道不容易，心機小店已經買少見少，各位想支持的，識做啦。