深水埗新開義務獸醫診所︱善行動物診所兼阿棍屋負責人：我只係流浪動物嘅擺渡人

「單計去年，無論查詢，抑或送來暫託的動物就有數十宗個案，差唔多隔日就有一單……」慈善動物收容所阿棍屋的創辦人 Ivy ，談及香港移民潮時不禁神色黯然，皆因她自2015年耗費所有積蓄成立阿棍屋以來，鮮有經歷過如此誇張的棄養潮。眼見街上諸多流浪動物無家可歸、傷病纏身，於心不忍的Ivy毅然選擇將機構籌募得來、總額超過二百萬的善款，用於開設全港首間義務獸醫診所——善行動物診所，為浪浪們免費提供絕育與各種醫療服務。籌備了一年的診所近期開始試業，Ivy距離對逝世愛犬阿棍的承諾及當初因患病而向佛祖所許的宏願似乎又近了一步。

文：Layne
圖：Layne、受訪者提供、Facebook（阿棍屋、善行動物診所@阿棍屋）

Ivy表示由於自己及家人都有養狗的習慣，對牠們的習性較熟悉，所以在營運「阿棍屋」之初，大多數時間都是主力照顧流浪狗狗，能發展到今時今日的規模，實屬意外之喜。

接連經歷患病、愛犬離世化悲痛為「阿棍屋」

「一切源於我朋友知道我好鍾意動物，所以他就想帶我到繁殖場了解動物苦況，幾次往來都見到阿棍在場，湊巧場主提起『佢冇人要呀、賣唔出呀』，我就提出『如果你唔介意，不如我帶佢返屋企啦』，於是我大概在2005年開始領養只有兩歲大的阿棍。」直至2013年，仍是幼稚園助教的Ivy與丈夫開始接觸動物義工事務，除了愛犬阿棍以外亦嘗試照顧其他受傷的流浪動物，正當二人四出救濟浪浪之際，此時家中卻傳來噩耗：「那陣子我因為婦女病而飽受煎熬、疑慮頻生，突然得悉阿棍患上乳腺癌，我頓時陷入人生低潮，索性辭去工作，全心全意地照顧阿棍。」

2014年，阿棍離世，Ivy再受沉重打擊、終日自怨：「我成日覺得自己做主人好不足，覺得自己欠咗阿棍……」某日Ivy念頭一轉，決定將這份悲痛與內疚化為動力，以愛犬之名設立了「阿棍屋」，租下元朗一間大約千多呎的鐵皮廢屋，並將其改造成動物收容所，成為了十多隻流浪狗狗的安身之處：

「其實一包英泥都係錢嚟㗎，要將一間廢屋整做有有瓦遮頭嘅地方，不是十幾萬就可以做到的事，當時我和丈夫花光可動用的資金亦未夠，幸得善心網友捐贈英泥、狗糧等物資，舊中心才得以落成。」

後來隨著求助個案日益增多，阿棍屋獲稅務局認可、於2017年正式成為註冊慈善團體，將收容所遷至錦田馬鞍崗現址。及後又在2020年得到發展局撥款，於同區高埔村興建新收容中心，兩間收容所合共居住了逾300隻動物，除了流浪貓狗外，還有山羊、烏龜及雀鳥等「另類住客」。

「阿棍屋」的首個中心由鐵皮搭成，由設計、燒焊裝嵌、落水泥都是Ivy與一眾義工一手包辦。

直至2017年，阿棍屋由千餘呎的舊中心遷往佔地約一萬四千呎的馬鞍崗現址，浪浪們亦有更寬敞的活動空間。

去年11月尾，阿棍屋位於高埔村的新收容中心正式落成，Ivy說有賴楊雪盈、鄺俊宇等前區議員幾年前倡議善用閒置土地，方有如此成果。

阿棍屋收容所內住著不少罕見的浪浪，被命名為Billy Yeung的山羊仔便是其中之一。

Ivy分享曾有一位80歲的婆婆因病需要入院治療，家中留下兩頭烏龜無人照顧，其親人聯絡求助，於是阿棍屋便暫時成為了牠們的容身之所。

深信動物有靈設「善行」全方位救助浪浪

收容的動物種類繁多，Ivy解釋皆因自己從小在元朗鄉村長大，頗多機會接觸到野生動物，因此自幼對動物親近，冥冥中有種說不明、道不清的聯繫，認為「動物有靈」，無論一隻蝴蝶、蝸牛都是大自然的產物，而它們能過著自己嚮往的自由生活是件無比幸福的樂事。「有個非常深刻的例子，曾有隻被主人遺棄的狗仔，本來初初來到時並無異樣、健步如飛。但在翌日，牠彷彿突然間意識到自己被遺棄，當堂成個樣好似生意失敗咁，隻後腳連行都行唔到，在廁所出來時，拖著後腳、步履蹣跚。佢話畀我知，其實佢真係有靈性。」Ivy又表示她曾目睹被狗咬傷的山羊，不顧身上正流血的傷口，緩步走近以「咩咩」叫聲求助，

「種種事件令我不禁反思生命的價值，這世界每條生命都十分寶貴，哪怕是一隻羊，在受傷的時候亦懂得向人求助，那時我便知道除了救狗、救貓，其他動物亦不該置諸不理。」

冷言冷語，Ivy聽過不少，但卻始終未能動搖她堅持拯救浪浪的信念，她說：「可能就係因為有呢啲說話先激起到我嘅鬥志呢。」學懂「轉念」比一味埋頭苦惱更有用。

診所內安置了幾隻等待接受絕育手術的浪浪，這隻眉頭深鎖卻極其親人的唐狗叫「皮皮」。

基於這份善意，Ivy自去年年初開始收集、購入各類醫療物資，可惜一直未能找到合適地方，也未有獸醫願意加盟，所以開設診所一事一拖再拖。「直至今年開始認真物色舖位、與診所現址的業主傾談，當時他說『其實我未放租，而呢刻唔止得你傾，仲有啲做飲食、車房嘅單位，但係我唔打算租畀佢哋。』原來他亦喜歡動物，所以就算舖位未放租，亦願意預留位置與租約予阿棍屋，聞言我實在是喜出望外！後來又透過朋友介紹結識到譚頴君獸醫，『善行動物診所』才正式成立，所以有啲嘢真係好奇妙，不得不說是場緣份。」

診所不會對外開放接收需要收費的診症，只要浪浪符合條件，那麼無論內、外科診症，甚至手術及藥物都毋需任何醫療費用，所以各位善長的捐款無疑把握著診所的命脈。

在開幕當日，網媒《100毛》藝人——東方昇亦有到場恭賀，原來他私底下亦是一位不折不扣的「毛孩Lover」。

包括租金、裝修、添置醫療儀器，Ivy前後合共花費約二百萬：單單一間合乎輻射管理局要求的X光室便需要二十萬，一部功能全面的驗血機價錢更直逼三十多萬……現時診所內大部份器材已安裝及完成使用測試，但由於已訂購的X光機仍未送達及安裝，所以診所暫時未能提供X光檢查。另外亦有少部份已訂購器材及用品因運輸延誤仍未送達，為免在儀器不足情況下對診症產生影響，Ivy表示診所會先為已申請登記及接受探訪的義工們提供免費的流浪動物絕育手術，至於其餘醫療服務預計將於九月中旬陸續推出。

診所環境光鮮亮麗，一旁擺放著及膝長櫈，方便陪同浪浪求醫的義工在場等候及隨時安撫牠們的情緒。

至於診所另一邊則是獸醫的診症室，Ivy表示其中一項營運動物診所的難處便是與獸醫商討浪浪的治療方式，譬如萬一獸醫建議需要使用阿棍屋不提倡的「安樂死」，那該如何處理？Ivy說會盡量堅持自己的決定，亦會對所作的決定負責任。

從租舖裝修到更改能夠負荷所需的供電系統與設備，每項細節都要投放資源、心力，開設動物診所並不似坊間想像簡單。

診所深處的鐵籠看似冰冷侷促，但對於一眾長年流落街頭的浪浪來說，已是頗為舒適的環境，至少毋須受蚊釘蟲咬、風吹雨打。

種善念得善果動物義工做事從來不「異」

談及動物義工，不免讓人想起網上對他們的諸多指罵：「動物『異』工、偷貓偷狗」云云。Ivy 卻說：「我認為任何人去關注流浪動物，都是出於一份善念，做任何事都不會得到所有人的認同。義工做事背後總有原因，可能站於他們的角度是認為『佢流浪，我帶佢返屋企』，其實係啱㗎喎。但亦有人覺得『喂，佢流浪咁多年，你捉佢返去、困住佢，其實好慘㗎喎。』所以其實只要他（義工）當初起的是善念，認為是對動物好的，他所做的事便應該稱為好事。」尤記得曾有議員就動物權益提出議案，雖然事件未有定論，Ivy則表示：「其實至少叫踏出了第一步，政府做是一件事，但市民配不配合又是另一件事。例如導盲犬理應可以進入餐廳，但點解會有人拒絕呢？開車撞死動物，法例規定要停車、報警，早前有位的士司機撞死動物，途人便主動向他提出『喂，你宜家撞死隻動物，你真係要企定定喺到，等差佬嚟㗎喎』，有相關法例支持對我們關注流浪動物的人來說，終歸是件好事。」

Ivy表示各位浪浪義工可以事先填妥申請表格，經相關團隊Site Visit及阿棍屋審核，確認照顧浪浪的經驗與實質行動後，便可以免費預約使用診所的醫療服務。

除了義工求助個案之外，Ivy說診所亦會接收來自社工轉介的無家者個案，因為街上不乏與狗狗相依為命的無家者，倘若狗狗有事，無家者的感受與痛失至親無疑。

Ivy話鋒一轉，建議各位香港人，若想幫助街上無依無靠的流浪動物該由以下幾點入手：

「首先要幫他們絕育，絕育之後繁殖率下降，街邊自然就少了流浪動物。但更重要的是，貨倉、車房等場所工人應要肩負照顧鄰近浪浪的責任，佢哋至少都叫做『半個主人』，咁係唔係應該要同佢入晶片、絕育，做返足應該要做嘅嘢呢？譬如你要搬、你車房要搬，你會唔會考慮帶埋佢走呢？好坦白講，你唔帶埋佢走，咁咪即係由得佢自生自滅、喺條街到流浪囉。」

「另外，何解遺棄毋須罰款、人道毀滅又不設付款呢？就咁拎去漁護署就可以免費將浪浪人道毀滅喎……所以我認為如果要改善香港的流浪動物問題，至少要從這兩方面進行教育。當然，亦不可以忽視最大的源頭——買賣動物。」

自幼與佛教結緣許宏願化身「浪浪擺渡人」

Ivy言談間時有提及「緣份」、「眾生」、「靈性」等詞彙，加上診所一角供奉的「藥師琉璃光王佛」佛像，不難猜出她是位虔誠的佛教徒，診所命名為「善行」是否亦因此而起？「其實我自小便有這種『念』在身上，但未必十分深厚，可能是幼時跟著媽媽拜神、拜訪寺廟，潛移默化下我開始遵循這宗教的教條。直至後來我陷入上述的人生低潮，『宗教』便成為了我從谷底爬返起身的精神支柱。」Ivy又說，當初自己身處痛苦迷惘之中，曾向天許下宏願：「當時我發願、希望可以渡過這個難關，而我亦會幫六道眾生脫離苦難。我相信上天真係聽到，所以亦給了我一個機會，我經常話自己從沒想過要辦阿棍屋，但這似乎正逐漸成為了我的使命，我曾經同個天講過，而個天畀咗條路我行，咁我就要將呢個使命好好做落去。」