長沙灣甜記餃子｜靠生餃疫市求生店主：無時間悲觀

肺炎第三波爆發，確診個案日日升，那邊廂的餐飲業，生意額卻一天比一天低。小店要生存，單靠賣力，已經不夠。一個能自我調解情緒的心態，就如口罩一樣，是疫情下每日工作時的必需品。開業一年多的長沙灣餃子店「甜記餃子」，店主陳先生坦言現時是開業以來最艱難時期：「睇住生意每日都drop少少，就算第一波，第二波疫情時都無咁差。」

文、圖：Hang

實而不華新鮮餃子

店主陳先生出身工程師，以往工作需要，中港兩邊走，幾年前他有感職途不明朗，為前途，決定做點小生意，與朋友合夥開餃子店，後來朋友離場，他改為一人上陣。小店的餃子每日鮮包，以傳統口味為主，一共11款：白菜豬肉、菜芯豬肉、韭菜豬肉、香葉豆角豬肉、京蔥羊肉等。餃子不花巧，賣的是新鮮：「最緊要食材新鮮，存放超過1日半的食材，我哋多數都唔要。」餃子皮，訂製圓而薄身的。餃子餡，刻意多菜少肉，肉不選太肥的，蔬菜也不會切得太細碎，讓餃子保留口感。像韭菜餃，就吃到爽身有咬口的韭菜。當中最受歡迎的，要數「粟米芝士雞肉餃」，餡料中加了2款不同的芝士碎，或湯或煎，都吃到頗濃的芝士香，不蘸醬汁都好夠味。

致命的6pm堂食禁令

開業一年，縱然經歷了社會運動，但餃子乃家常小食，街坊醫肚之日常。「當時生意只跌了一至兩成。」陳生生說，甚至疫情襲港初期，外賣單也一直上升。「無論生熟餃，外賣單也升了50%，可以幫補堂食的跌幅。」萬萬估不到，致命的，在後頭。早前的6點後堂食禁令消息一出，肺炎確診無即時下降，對餐飲業的傷害，倒是立竿見影：「條街即時少咗好多人，個個返屋企自煮。我哋堂食外賣都一直跌，直到今日仲跌緊，每日都跌少少。我估計最少會持續多1至2星期。」

香港人無時間悲觀

話雖如此，餐廳開得門，租金人工貨錢就要交，與其灰心，不如自救。「除非唔做啦，否則真係無時間悲觀。就好似呢一年香港人經歷的一樣，放棄的話，就即刻完。做得幾多就做幾多啦。」以往沒有下太多心機做好外賣的流程，諸如「餃子浸得太腍」，「湯唔夠熱」、「倒瀉湯」等的負評都會收到。陳先生坦言還在摸索如何改善中，像外賣盒的質地、用料、設計、如何分湯等細節，每日都在微調中。「好似豆漿的膠樽，我唔想浪費，而家都會洗乾淨再回收。之前也有研究不用膠盒裝湯餃子，但暫時仍未找到代替品。」