【編按：AndThen.hk誠邀飲食達人「煮場正氣姐」出山，不定期在本網站為大家分享各種識飲識食好推介，保證獨家及真心。】

煮場正氣姐
FB專頁 煮場新聞 主理人，典型金牛「知識 L」（姐是知慳識儉啊！），從小食慣好東西，擁有黃金舌頭兼豐富飲食知識，日日扭盡六壬確保食得好、食出最高性價比，最憎呃神騙鬼飲食界敗類。

我自初中便跟家姐用雜誌郵購法國時裝，此後一直崇洋郵購、網購。中招次數之多，令我煉成今日的火眼金睛，一scan便知間網店掂唔掂。武肺疫情耍了我們7個多月，相信大家點都會網購下食材在家中煮飯仔。今次我煮場正氣姐隆重在AndThen.hk登場，唔會跳老舞，但會為大家推介4間我經常訂購食材的網店及他們的Best Buy，等大家同我一齊晚晚做女皇，食好嘢！

文：煮場正氣姐 
圖：相關網店、Unsplash、煮場正氣姐

【4大食材網店 基本比較】

*以上資料以網店最新公佈為準，訂購前請再作查詢

（1） 高CP值品味系｜Let’s Cook 煮吧！

 【賣點】
精選西班牙、澳紐、美加、日本等地優質食材，肉類、海鮮、湯飲、糧油醬醋、米麵、pastry、水果等等，一網打盡！

念念不忘「豬中和牛」

其實我掙扎了一輪應否高調介紹「 Let’s Cook 煮吧！」，因為我怕之後再難訂購我的心頭好。最初幫襯 Let’s Cook是經朋友口碑介紹，一登入網頁已 feel 到「OMG！一定大出血！」

Let’s Cook 的獨特之處是他們從世界各地搜羅食材、飲品，包括糧油醬醋米麵pastry水果……等優質貨，最吸晴的是西班牙杜洛克黑豚（Duroc）及西班牙橡果黑毛豬（Iberico）的多種部位選擇。

作為平日路過中產超市，買到西班牙杜洛克黑豚連骨豬扒都會偷笑的可憐人（因家住老區連一家見得人的超市也沒有），Let’s Cook 的選單實在令人心花怒放，就連常被稱為「豬中和牛」或「豬中王者」的Pluma都有！Pluma即豬肋眼，是取自肩部和脊部中間的那塊三角形片狀肉，每隻豬只有兩件，狀似羽毛、細嫩得來油脂豐富兼肉味濃，簡單烤焗或用來做叉燒已非常美味，吃過會念念不忘。

 安心食草飼牛

另外我很注重有草飼的選擇。榖飼即以粟米、燕麥、大豆等作飼料，美國粟米產量全球稱冠，但超過70 %的美粟及90%的美豆都經過基因改造，燕麥亦常被驗出含致癌除草劑，所以有標明榖飼或草飼很重要。

Let’s Cook則有很多安心選擇，除了草飼、穀飼任君選擇，三文魚也是來自紐西蘭南面最高冰川水源，以非基改飼料飼養，不含激素及抗生素。重點是非常肥美！個cut又不會太厚很易控制火喉，可安心煎至半生熟享用。

講到性價比，冰川三文魚在  HKxx Mall 的價錢是 $122/200g （正價） ，Let’s Cook 經常售價是 $108/200g，真係有比較先識揀。

【總評】

• 特色推介：西班牙橡果黑毛豬排骨粒（$84/500g）、頂級封門柳牛肉（$140/500g）、極罕日本天然野生捕捉鯖魚（$330/一條約800g）、澳洲急凍牛油果片（$80/500g）、紐西蘭走地雞蛋Jumbo Size 2.5oz（$120/15隻）
• 燒錢指數：★★★★★
• 抵讚位：唔賣巴西激素大國肉類產品，食材盡量無添加
• 有待改善位：價錢以單位計算，例如每包2件的豬肋眼約450g價錢為$130，但每件貨的真正重量不一，最終價格有待落單後店家量度實際重量才可確定，較難預算
• 客服表現：老闆娘事事親力親為，客服優良
• 運費比較：買滿$800多種溫度免運費，即雪櫃溫度（攝氏零度至4度）及冷藏溫度（攝氏-18度或以下）；買滿$500單一溫度免運費。未滿$500， 收$50運費。

【Let’s Cook! 煮吧】
網址：www.letscook.store
FB：letscook.store

（2） 科研健康系 ｜ 良糧

【賣點】
由80後護士及營養師創立，主打有機、三無（激素、農藥、抗生素），並有新鮮收割本地有機蔬菜及本地老字號湯料包、凍肉、五穀糧油、健康零食等。

送貨完善絕無融雪

相信大家都有過近似體驗，明明訂的是儲存於冷藏溫度（即攝氏-18度或以下） 的急凍食物，送到來卻完全融解，店家完全無視食物安全！「良糧」是其中一家令我非常安心的網店，每次都用冰袋封好，凍肉沒有丁點融雪。

良糧也強調自己走「科研」路線，究竟網上超市同科研有咩關係呢？唔通賣納米瑞士山區肺？非也！原來良糧與一家本地實驗室合作，幫客人做 DNA 檢測，按客人的基因去設計專屬的健康飲食計劃。但良糧本身亦是一家網上超市，煮一餐飯需要用到的食材、油鹽醬醋也能買到，最難得是提供本地有機蔬菜。

優質足料湯包

由於蔬菜比較難儲存、易腐爛，一般網店都避之則吉。良糧賣的則是元朗錦上路濼佃UrbaNature的有機蔬菜，我試過大部份時令蔬菜瓜豆，全部都非常滿意。原因是客人下單後，農場才收割農作物再放入獨立膠袋，收貨後消毒外袋便可直接儲存於雪櫃，非常乾淨企理。有次買的青豆角足足煮了四餐才吃完，而我經常一次過購入一星期的食材，瓜菜放足7 日也狀態良好。當然我會先吃葉菜類，瓜豆通常也較耐存。

但有菜有肉無啖湯又怎算一餐合格的正餐呢！良糧代賣百草湯料的足料湯包，手殘都可以煲到靚湯。百草湯料經營了20年，在香港有自家農場。收到order 他們便會去皮切好食材再真空包裝，湯包可於雪櫃存放10日。煲足料靚湯終於不用花很長時間去皮切件，洗淨、浸泡，加肉或骨或腰果去煲兩至三小時便完成，每次家人都大讚好味！

【總評】

• 特色推介：百草湯料補腎益腸湯料（$180）、清肝袪骨火湯料（$105）、UrbaNature 的本地有機蔬菜  （$18- 50）、  瑞典皇室天然無激素雞套餐（雞中翼、雞全髀、雞鎚仔各1kg）（$159）
• 燒錢指數：★★★★☆
• 抵讚位：難得走健康路線的網上超市，真正買到煮一餐飯的所需食材。逢星期三及星期五清晨收割蔬菜，並於當天下午安排送貨，保證蔬菜夠新鮮！有會員積分計劃，變相有折扣
• 有待改善位：部份產品定價略貴，如悅和紹興五年花雕（250ml / $60），同類網店只售 $45 
• 客服表現：CS有禮貌，回覆也算快
• 運費比較：買滿$800免運費；未滿$800則視乎消費金額收取$20-$100作運費

【良糧】
網址：www.etaste.com.hk
FB：excellentastehk

（3） 懶人美食系｜好生活

【賣點】
台灣極罕優質乾糧、醬料、零食、雜貨，以及一眾香港心機食材、飲料、醬汁、麵食、即食餸包，就算唔識煮都有餐好食。 

吃得好才算「聰明懶」

每次去台灣我都瘋買醬料及食材，「好生活」竟然在大家無得飛的日子帶來愈來愈多的台灣好物，如得獎朱古力、咖啡、米粉、麵、豉油甚至鹽糖等等等等，實在太感動。仲有我每次帶豉油及所有玻璃樽醬料回港都十萬個驚，而家呢種驚就留俾好生活喇。

雖然小學的我已出入煮場學煮兩味，但人生有時都想飯來張口，在家做個「唔煮達人」。所以我不時都會上好生活這個新近成立的網站入貨，預備一些加熱美食或高品質即食麵。

可能大家同我一樣，最初認識好生活是因為嘉義百年老店東和拌麵，當時在fb見到人人入貨，無理由唔跟隊！台灣拌麵食得入口的，往往都要十幾廿蚊包起計，但「好生活」的期間限定原箱優惠價，除開每包只是$10.5，金牛座的我真心忍唔住笑左，好抵呀！

超靚米粉一淥即吃

講明要做唔煮達人，有時身體懶到一個點，連開火的能力都無，我就靠老鍋米粉（單一口味$59.9/4包）醫肚。坊間的「假米粉」成行成市，唔信你到超市走一轉，看看成份標籤，其實只有100%純米製作的才是「真・米・粉」！米粉的好是只需用熱水泡便可以食用，再配上網店有售的港優糧本地製作即食加熱餸包，你再懶都可以食得好。

而作為偽中產，通常tea time會飲杯咖啡，好生活入了The Carbonation港產Tonic Water（$24/200ML），輕輕鬆鬆就可以嘆杯冰凍Kaffe Tonic。仲有其他小吃不少也是優質貨，例如我幫襯過The Roll蛋卷樂園，蛋卷每5條一小包裝保持香脆，全線產品勝在完全無添加及用上入口一級材料。而我最喜歡的法國玫莓（$148/15條），粒粒法國有機覆盆子粉末混和於脆香蛋卷當中，酸酸的很開胃，每次都可以 KO 一小包。

【總評】

• 特色推介：老鍋米粉風城傳情禮袋 ($168/4種口味各2包共8包）、黑糖農莊張師傅手工黑糖原味手工黑糖 （$88/500g）、原居文化陳皮南棗釀（$138/240g）、The Roll 蛋卷樂園法國玫莓（$148/15條）
• 燒錢指數：★★★★☆
• 抵讚位：超多乾貨選擇。包裝企理，利用膠袋充氣防蔬果碰撞，每次送來的茄子又大隻又靚仔
• 有待改善位：買餸只有菜類，無肉類選擇
• 客服表現：優良，對答有來有往無失蹤。送貨年輕人甚有禮貌
• 運費比較：港九地區買滿 $399、新界地區滿$499即免運費；未滿金額收$80運費

【好生活】
網址：goodlife.com.hk
FB：facebook.com/GoodlifeShopHK

（4） 手殘邪惡系｜ 叁拾士多

【賣點】
自家生產高質香港地道美食急凍包，另有急凍肉類、海鮮、醬料、麵食、酒類、零食及甜品等，俘虜港男港女個胃。

鎮店之寶港式魚肉燒賣

雖然每次向「叁拾士多」訂貨都要等上10日才收到，但高汁美食是值得等待的，尤其塘牛（即沙爹牛肉）真心好味，已訂過好多次！沙爹牛肉所用的醬料及牛肉好重要， 叁拾士多老闆選用美國極佳級Prime Grade牛肉及本地老字號綿香的沙爹醬去製作，綿香沙爹醬一向供貨給本地潮州餐館，我由細食到大，真係特別有感情。

叁拾士多曾創出銷售神話，一夜沽清一萬粒鎮店之寶 —— 魚肉燒賣（$35/600g，每人限買5份）。平時cheap cheap街邊魚肉燒賣都是一團粉，難以入口，叁拾士多卻用上紅衫魚及門鱔，有魚味、有彈性。

最記得3月疫情嚴重，一家人真的完全足不出戶。日煮夜煮的我，忽然很想發癲大叫：「我要食咖哩魚旦、魚肉燒賣、碗仔翅、臭豆腐、豬大腸、茶餐廳沙爹牛肉麵 ……」 講真香港人的生活又點何以缺乏街頭小食？我而家已練成預早落單儲定糧，quarantine的日子都無咁難捱。

直送日韓即食海鮮

相信最令香港人吊癮想必是無得飛。我屋企半個食物櫃早已吉了，往日不時直飛日韓買醬料、乾貨，現在慘到只剩下一包紫菜。好在叁拾士多入了韓國最大鮑魚產區莞島的即食醬油鮑魚 ($550/ 6隻)，莞島養殖場的海床滿佈麥飯石，麥飯石能吸附水中重金屬離子及致害毒素，降低細菌數量及淨化海水。

如果有日禁足令出現，一家人又會悶到發癲，絕對值得一人「隊」一隻鮑魚，安撫空虛的心靈。日本直送的即食原隻魷魚仔（$49/250g）亦令人難忘，魷魚筒內的內臟真的超甘甜好吃，令人好懷念「家鄉」呢！

【總評】

• 特色推介：塘牛（$38/200g) 、臭四 ($28/200g)、喱老味 ($28/200g)、串SEVEN咖哩魚蛋（$35/200g)、魚肉燒賣（$35/600g）、邪惡夠抽鵝腸（$88/220g）
• 燒錢指數：★★★★★
• 抵讚位：地道美食慰藉「被困」港人身心靈
• 有待改善位：安排一般，訂貨後久久未有通知送貨日期
• 客服表現：電郵、打電話也聯絡不上
• 運費比較：買滿$500免運費；未滿則收$100作運費

【叁拾士多】
網址：30store.hk
FB：facebook.com/30store.hk

慘痛網購經歷「開眼界」

是咪好推介？大家試過就知我煮場正氣姐唔耍人！

網購失敗之路我可以寫幾本書。就好似政苦菜統處那個買菜app，本意是幫本地菜農同漁民，但管理完全不善。我曾經多次訂購去支持本地生產，但次次都投訴收場。

最震撼十幾億人那次是一開門，親眼見證送貨那個來如流水去如風的武林高手，把整袋魚菜瓜等從手上飛向地下 …… 然後半秒消失。作為《鬼滅之刃》粉，我認為此人道行已介乎「貳之型」與「叄之型」。我更收過全融雪流血水的急凍魚及已發霉流汁的番茄！如果政苦可以做好啲 ……

算啦，香港人都係自求多福，好似我咁上網搵其他出路好過。