油麻地嘉多娜餅店的法式布甸包早在兩年前推出時，已經大受港人熱捧，日日排長龍。最近油麻地店更新推出新口味——黑白布甸竹炭芝麻包！面層滑捋捊的燉蛋白配上流心芝麻醬，甜而不膩。每日限量120個，想買到心頭好，就要事先早點排隊。今次編輯部就實地直擊平日的排隊情況，兼為大家試食新品！

人龍堆滿正門 隊尾延伸至轉角

黑白布甸竹炭芝麻包出爐時間為下午四時半，小編大約四時就去到油麻地分店，已經見到餅店門外大排長龍，龍尾已經去到轉角位的七仔。現場見到除了街坊以外，亦有家長帶同小朋友一同排隊等候，亦有人手持裝著麵包的嘉多娜膠袋，相信是剛買完麵包又在排隊等候出爐。

大約四時十分，隊伍開始向前移動，一開始小編以為是有人先離開隊伍，但是隊伍人數不斷減少。小編才知道原來布甸包早了出爐，所以如果大家想一嚐布甸包，記得早點來排隊，萬一像當天一樣，分分鐘四時半左右就賣完了！手快有手慢冇！

小編大約在四時半左右進入店內，前面的顧客們都是一次過「包款」，購買油麻地分店供應的三款布甸包：原味、京都抹茶紅豆麻糬法式布丁及新推出的黑白布甸竹炭芝麻包。

如果想一併購買嘉多娜其餘麵包款也不用擔心麻煩，店員姐姐一早分崗位站好，只要向姐姐們說出想要哪些麵包，姐姐們就會為你包好。小編今次購買了兩個新口味的黑白布甸包，雖然店內十分繁忙，但店員姐姐還是會打開餅盒和你確認購買的麵包款式，態度亦都十分友善。

入口甜而不膩 口感似雪糕

從完成購買到試食，中間大約隔了二十分鐘。可能因為天氣炎熱的關係，二十分鐘內布甸就呈下塌狀，切開後連布甸部分也變成流心。

編輯部試食感覺布甸部分比起燉蛋白，更像是牛奶布甸的味道，單吃布甸的話可能會有點過甜，配上清新的黑芝麻醬就剛好！反而竹炭法包吃下去感覺像普通麵包的味道，比起一般法包亦都偏軟和濕，應該是因為布甸有水份的緣故。

編輯部決定把另外一個布甸包先雪藏一晚再試食，結果第二天一拿出來過了五分鐘，布甸就開始溶化。而麵包經過一天的雪藏亦變得更濕，所以為了吃到原汁原味，大家購買後記得盡快享用啦！

以往編輯部也試食兩款布甸包，感覺今次新品應該是味道最清新的一款，甜度則與抹茶味相約。

試食報告傳送門：bit.ly/3w5N6UU

【嘉多娜天然酵母手作麵包店 （油麻地分店）】

地址：九龍油麻地碧街54號地下
出爐時間：星期一至六 4:30pm （建議提早半小時至45分鐘排隊）