去深水埗西九龍中心8樓的美食廣場食嘢可能會「食唔安，坐唔落」，並唔係因為食物難食，而是用餐的「斜櫈」愈來愈斜，坐得唔多舒服。其實除了8樓有美食廣場，商場今年初亦將6樓的「大廚」Food court 擴充，進駐多間食店，並採用半開放式廚房設計，讓大家舒適地坐低享用美食。編輯部最近親身去試食，推介以下4間小店，由頭盤炸雞、主食和牛丼，再到甜品香蕉煎餅或梳乎厘均有選擇！
文、圖：陳粒
① O BOY CHICKEN｜即叫即炸酥脆炸雞
四月才正式開張的「O BOY CHICKEN」是一家主打新鮮現炸炸雞的小食店。店家強調「剛炸出來的熱騰騰炸雞才是最美味的」，而且其粉漿和醬汁均為自家調製，開業不久便在Threads上獲得好評。
小店餐牌設5款炸雞套餐，亦可單點。最平$48就食到半份原味美式炸雞，套餐包括雞下脾、雞翼、雞金塊及薯條。除了原味，還有煙燻醬、德州燒烤、韓式蜂蜜芥末及明太子醬口味選擇。炸雞外皮香脆，肉質嫩滑兼有肉汁；雞金塊與坊間的急凍麥樂雞相比，肉質厚實不乾身，原來小店的雞金塊每日新鮮攪肉，簡單調味已很可口。店家的薯條也是即叫即炸，特別推介蒜香奶油味，醬汁撈得均勻，入口不會「乾噌噌」。另外，炸雞還附有自家醃製的酸蘿蔔，開胃解膩。食炸雞最憎雙手油淋淋，雖然美食廣場內設有洗手盆，但店家有提供手套，食炸雞就更方便。
包括雞下脾 x1，雞翼x1，雞金塊x2，炸薯條，套餐附有自家製的醃蘿蔔及洋蔥酸忌廉醬汁。
【O BOY CHICKEN】
地址：深水埗西九龍中心6樓大廚美食廣場6FC54-59號舖
營業時間：12nn – 9pm
IG：oboychicken
② 牛執事｜大份夾抵食和牛丼
食完頭盤炸雞後，便輪到主食。今年初進駐6樓 Food court 的「牛執事」主打和牛丼飯及和牛小食。店家選用高蛋白質、肉質較精瘦兼有嚼口的澳洲黑毛和牛炮製4款和牛丼，包括火山丼、月見漢堡丼和原滿丼等，當中的招牌「火山丼」就選用後胸腹的部位，經過慢煮鎖住肉汁後，再現場鐵板燒增添風味。食客可以近距離觀賞廚師即場煎牛，將牛肉切片鋪在珍珠米飯上，最後放上溫泉蛋，未食先滿足視覺享受！
火山丼肉量及飯量都多，售價$78，難怪不少網民大讚抵食！建議先品嚐一片和牛，再撈蛋汁與白飯一同食用。和牛肉質細嫩，肉味濃郁，配搭蛋汁後口感更滑，加上自製的柚子醬汁，微甜清香。除了丼飯，和牛牛丸也值得一試。牛丸每日新鮮手打而成，並無添加調味料，肉質彈牙富油香。不過要注意，第一口咬下時肉汁會爆開，小心燙口～
【牛執事】
地址：深水埗西九龍中心6樓大廚美食廣場33-35舖
營業時間：11am – 9pm
IG：wagyubutlerhk
③蕉積妹｜超足料香蕉煎餅配泰茶
在葵廣開業3年的「蕉積妹」，憑著多款口味的香蕉煎餅深受港人喜愛。最近更進駐西九龍中心，不僅可以坐低食件餅，更可以一邊品嚐泰式茶飲，原來隔離舖「泰茶舍」也由蕉積妹開設，主打泰式奶茶和椰奶飲品，一次過食到香蕉煎餅配泰奶的泰式滋味！雖然小店主打泰式香蕉煎餅，但店家不時推出新口味，包括法式焦糖、開心果醬，以及鹹食的煙肉芝士煎餅。甜食的香蕉煎餅餅皮經人手搓製，並放置一晚，令口感更鬆脆。
記者點了法式焦糖香蕉煎餅，煎餅即叫即煎，內裡包著香蕉和雞蛋，上碟後灑上韓國幼黃糖，以火槍燒至焦糖化再淋上煉奶；煎餅切成16小塊，每一口也夾著香蕉，外脆內軟，整體不油膩、甜度適中、香蕉又足料，值得一試！店主還透露即將推出明太子及黑松露蘑菇兩款新口味添。店家每日營業至晚上9:30，不過蕉餅有機會提早售罄，想食嘅朋友就要留意店家每日最新動態啦。
【蕉積妹】
地址：深水埗西九龍中心6樓大廚美食廣場C39-41號
營業時間：12:30pm – 9:30pm
IG：chiuchikmui
【泰茶舍】
地址：深水埗西九龍中心6樓大廚美食廣場C36-38
營業時間：12:30pm – 9:30pm
④ Zzz Soufflé Pancake｜空氣感梳乎厘班戟
由頭盤食到尾，即使再飽也抵擋不住甜品的誘惑，特別是梳乎厘班戟！6樓 Food court的甜品店「Zzz Soufflé Pancake」今年初開業，不過店家沒有固定的營業時間，想食班戟可能要碰碰運氣。記者當日約下午4時到店，已見店主一人埋頭製作班戟。
班戟共9款醬料口味，分別有經典奶油、焦糖吉士、焙茶、提拉米蘇等，還可免費搭配自選口味的雪糕球。由於班戟即叫即整，下單後需要耐心等候。在等待的過程中，可以看到店主由製作麵糊、打蛋白，到班戟逐漸成形，過程中讓人感受到一種治癒感。一份有兩層班戟，份量頗多，最平經典奶油口味只需$48，班戟的口感軟綿濕潤且富有蛋香，性價比高，如碰見小店營業中不妨一試。
【Zzz Soufflé Pancake】
地址：深水埗西九龍中心6樓大廚美食廣場C48-50
營業時間：從缺（逢星期一休息）
IG：zzzsouffle
