過去三年，移民人數有增無減，另一方面亦間接出現辭職潮，不論辭職原因是離開香港、轉行或另謀高就等等，其實大家都想好來好去，離職時請大家食散水餅，日後江湖好相見。上一代辭職普遍會買大型連鎖店的西餅作為心意，但近年愈來愈多小店推出五花八門的散水餅。編輯部特別為大家挑選了以下6間散水送禮小店，當中有米芝蓮推介，有口味創新台式刈包，亦有性價比高的手工曲奇，全部都可以手機落單，last day 送到上公司！

① 港島區首選｜多款口味台式刈包

散水餅唔一定係餅，包都可以係一個好選擇！位於西營盤的外賣店 BunBun ，主打每日新鮮自家製刈包，將傳統的台灣刈包加入新派口味，包括慢煮豬腩肉配黑醋醬、香脆炸雞配自家製青醬、麻辣肉醬配墨汁腸及韓式辣醬配炸豆腐，還有慢煮豬腩肉配黑醋醬，刈包夾着經慢煮6小時的豬腩肉，加入意大利黑醋醬汁、酸菜、花生碎及芫荽，用料相當豐富。用作散水餅送禮，賣相吸引而且還可以預先提供同事名單，店員會代筆手寫於每個包的包裝紙上，誠意加分！訂購亦很方便，不少於兩天前於whatsapp 或網上外送平台下單，選擇送貨日子就會有專人準時送到上公司（暫時只接受港島區）。

② 米芝蓮推介街頭小食｜西班牙油條

新入選成米芝蓮香港街頭小食推介2023的 twistandbuckle ，以西班牙傳統油條打響名堂，以傳統的味道配以不同邪惡配料、糖衣及手工製醬料，打卡滿分的造型，深受港人歡迎，更先後於尖沙咀及北角開設分店。其實除了堂食外，亦可於門市或網上購買禮盒裝，一盒分別有6件或8件自選，更有12種口味選擇，包括原味、開心果蓉配粒粒開心果仁碎、半熟香烤棉花糖及抹茶配果味麥片等，每盒亦附有3款醬料 (Nutella, 朱古力及鹽味焦糖)，啱晒3點3下午茶請大家食，訂購時亦可要求附上心意卡呢！

③ 搞笑插圖贈同事｜ Beans x 謝晒皮散水餅

「我捨不得你～夜～夜～」可能係你last day的心底話，香港插畫家謝曬皮今次就幫你畫出心聲。Beans早於2018年推出謝曬皮設計的散水餅禮盒，最先有「元祖暗黑版散水撻」及後期推出的「彩色祝願版Cupcake」，憑着搞笑抵死的插圖及字句牌，例如有#my friend is u及#my pen is blue等，是市面上難得有話題性及充滿玩味的散水餅，成功吸引一眾打工仔訂購為博得同事一笑。每盒均有12件餅，「彩色祝願版」口味有藍莓、抹茶、士多啤梨，蘋果，而「元祖暗黑版」口味有朱古力、抹茶、什莓，檸檬，大家不妨買晒兩盒盡顯心中情。Beans於九龍新界設多間分店，大家可選擇門市自取或到公司鄰近地鐵站交收。

④ 精緻法式西餅｜LA PATISSERIE des IDEES

撇除老派西餅，亦有新派西餅選擇，主打法式甜品的 LA PATISSERIE des IDEES ，於荔枝角D2 Place開業7年，以多款件裝蛋糕深受一眾OL歡迎，除了件裝蛋糕，亦可訂造原個蛋糕跟同事開心share。店主推薦幾款較多人選購的散水餅口味，有開心果紅莓慕絲蛋糕、檸檬乳酪蜂蜜蛋糕及多重朱古力。蛋糕外表華麗精緻，盡顯餅師的造餅技術。訂返一打半打返公司，是大方得體的不二之選。

⑤ 健康散水茶｜彩子手工無添加低糖飲品

食完lunch最好飲返杯茶，而想飲得健康，可以選擇 彩子，主打無添加及低糖的手工飲品，而品牌理念是透過簡單嘅飲品及新鮮嘅配搭，為生活帶一點甜。適合last day 為同事送上一點甜以作感謝。店主推薦樽裝飲品為散水送禮之選，一次飲唔晒方便雪藏，而飲品每月都會按當造食材而定，臨近夏天就有金鑽鳳梨水果茶、愛文芒水果茶及日本白桃柚子茶，啖啖新鮮果肉，味道清新。而另一人氣飲品有芋泥豆乳，每日新鮮蒸煮芋泥，味道濃郁。如公司女同事多，不妨訂購較養生的紅棗桂圓黑糖薑。

⑥ 獨立包裝精美手工餅 ｜幸福烘焙

以上幾款散水餅即時享用最美味，但如果唔想即時食可以考慮獨立包裝的手工餅，由藍帶畢業生主理的 幸福烘焙 ，於荔枝角設有烘焙工作室，主打無添加、無防腐劑及人造色素的烘焙食品。店主推薦皇牌曲奇、軟曲奇、法式費南雪蛋糕及果仁小撻做散水餅，每種款式有多種口味選擇。價錢由最低每塊皇牌曲奇$6.5起，加上是獨立包裝，於常溫狀態下可存放2 – 3星期，方便保存又衛生。想試晒不同口味亦有皇牌曲奇禮盒可選擇，包裝同樣精美，適合送畀各位女同事。