鬍鬚張_FI

太安樓新開啤酒專門店︱店主兼前區議員張振傑 首推自家手工啤「花光青春」

「由以前關注組開始就有『二撇雞』喺到,街坊又周不時叫我鬍鬚仔,咁咪當係一種Gimmick。」前筲箕灣區議員兼居民組織「興東東熹環境關注組」召集人張振傑(CK),為他2月於太安樓開設的手工啤專門店店名——「鬍鬚張」解畫時說道。辭任半年,突然宣佈開舖做生意,驚訝的不止街坊,就連 CK 自己亦說是「機緣巧合」。雖然他素來鍾情「隊啤」,但原來開店除了為興趣,還因著他對前同事們與街坊的難捨。

文:Layne
圖:Layne、受訪者提供

「鬍鬚張」的霓虹燈招牌在食肆林立的太安樓中十分搶眼。

半年回氣 一個月「釀」成手工啤小店

撇去宣佈「鬍鬚張」正式開張的帖文, CK 的工作專頁對上一次出 Post 已經是2021年7月8日,當天是他宣佈正式辭任東區區議員、解散「關注組」的日子……「其實呢半年真係停晒所有社區事務,雖然私下有同義工朋友、街坊聯絡,但係就冇再更新專頁,其實係話畀大家知:『唔好意思呀,我哋真係冇得再繼續服務你哋』。」自小住在筲箕灣東熹苑、正職為土木工程師的 CK ,在2016年與幾位同住東區、有志改善社區的朋友組成「興東東熹環境關注組」,他們的工作涵蓋社區環境、民生大小事,包括違泊、街燈照明、樹木風險評估等。2019年 CK 當選區議員,關注組一眾成員亦成了他最堅強的後盾,繼續與他攜手「做區」。可惜隨著 CK 辭任,「關注組」亦煙消雲散:「其實我自己都覺得好可惜,不過呢個世界好大嘅,總有其他嘢可以做。」

CK 口中的「其他嘢」,卻不是指社區事務。2022年1月,行經西灣河美食集中地「太安樓」的 CK 發現近出口處有間空置舖位,想起關注組的拍檔一直想「搵啲搞下」,於是他靈光一閃、決定要以自己的興趣——手工啤為主題搞生意。想法一發不可收拾, CK 隨即與拍檔著手籌備開舖,只花費了約半個月時間就完成租舖、LOGO設計、裝修等事務,與香港啤酒品牌「吹啤啤」合作開設了這間主打本地手工啤、兼賣其他酒品的「鬍鬚張」:「其實成件事發生得好快,我哋1月中睇舖、2月1日試業,之所以可以咁快成事,我覺得係因為以前喺關注組、區議會學到買入設備、設置收銀機系統、物流運輸等經驗。加上機緣巧合下,『吹啤啤』嘅老闆主動聯絡我哋合作,成間舖頭由入貨到 Networking ,佢都幫咗我哋好多。」得貴人相助,這位由前區佬與地區關注組成員拍住上、落手落腳張羅的手工啤專門店於2月19日正式開張。

「鬍鬚張」新張不久,不少物資都尚未到齊,採訪當天,便是這塊燈牌初來報到的日子。
CK 笑言自己在店中主要擔當「大腦」角色,負責統籌,至於實務則主要靠拍檔。
在疫情間,投放為數不少的金錢去開設「鬍鬚張」, CK 認為這個決定確實有一定風險,只希望「輸極有限」。


搞手只求打個和 冀小店成社區聚腳地

眼見香港疫情肆虐,經濟低迷、一眾小店苦海求天, CK 亦坦言在這時勢要兼顧土木工程師正職與「鬍鬚張」是個冒險的決定,平日返工、閒時抽空處理店務絕不容易,但他卻有著不得不為的原因:「其實件事唔係我一個人嘅決定,而係大家嘅共識。好老實講,我預計最差嘅情況係會蝕好多錢,但係最緊要係班同事嘅關係可以喺呢到得以維繫。啲錢冇咗咪冇咗囉,擺喺到都係冇用㗎啦,既然有個機會咪試下,最緊要係佢哋(同事)想成事。」CK 回想當初拍檔甫聽到他提出要在疫情間開舖開生意的第一反應,居然是無比雀躍地說:「試下囉」,反之他卻憂心忡忡:「好似好難喎,好似唔係好掂喎」他笑言是拍檔「好想試」,而自己對這盤生意則「冇乜信心」。但在同事的力撐下,他生出了向前邁步的魄力,一如幾年前挺身為社區、為居民力抗大財團的時候。

隨手開了一枝啤酒, CK 便一邊飲酒,一邊與兩位拍檔討論店務、談笑風生,氣氛夠晒 Chill 。
當日有台灣新貨到埗,CK 的其中一位拍檔忙個不停,一直將不同款式的手工啤上架。

「開張之後,都有幾位做關注組時已經認識的老人家專登嚟搵我哋,尤其是宜家佢哋經常需要落街買飯,行經都會入嚟傾下偈,其實係一件好開心嘅事。」曾在錦田居住的 CK 認為相比新界的街坊,港島區居民雖然普遍比較慢熱,但只要你願意細心傾聽,他們自然會慢慢敞開心扉:「喺新界嗰邊氣氛比較悠閒,好多街坊打開晒門咁,好容易就變得融洽,筲箕灣呢邊就係外表冷漠,需要慢慢融化。」想「融化」街坊絕非易事,所以 CK 對每位街坊都珍而重之,甚至直言想將小店變成大家的聚腳地:「雖然我嘅身份唔同咗,可能冇乜機會再參與社區事務,但係某程度上都好希望『鬍鬚張』可以延續到同街坊之間嘅關係。」

店內當眼處擺放著港島東區報《古東報》,供幫襯的街坊免費取閱。
當有街坊走進店內, CK 自然便會上前與他們攀談,街坊亦會問他選酒意見,這或者就是前區議員的親和力吧。
CK 表示自己對做生意完全冇經驗,「鬍鬚張」能否支持下去亦是未知之數,唯有睇街坊「畀唔畀面」。


招牌啤酒:「花光青春」、「那算白過」

正所謂「酒逢知己千杯少」,既然要成為街坊鄰里的聚腳地,又點少得多款美酒。「鬍鬚張」店面規模雖然不大,但卻搜羅了接近100款手工啤酒,由廣為人知的香港本地品牌:「吹啤啤」、「大圍啤」、「麥子」,到台灣出產的「酉鬼啤酒」、「啤酒頭」都有齊。當中以「麥子」出品的特色手工啤「Brown Ale 豬古力啤酒」最受歡迎,朱古力香甜中帶點椰子味道,在試業期間曾一度被街坊掃清光,堪稱「銷量之霸」。除此之外, CK 亦向大家推薦最近由台灣抵港、「啤酒頭」的獨特口味——芫荽啤「暴力香菜」及以農事曆法曆注為題、曾為「啤酒頭」贏得多個國際啤酒大獎的「二十四節氣」系列手工啤……店內產品枝枝各有特色,「 挽下手」能讓 CK 在疫情間殺出一條血路。

「鬍鬚張」除了手工啤以外,亦有售來自不同國家的烈酒, Gin 酒、威士忌、清酒應有盡有(價錢由$90至$840不等)。

不過淨係賣其他品牌的手工啤又怎能滿足 CK 的「野心」:「建立一個屬於自己的手工啤品牌」,於是他特地與「吹啤啤」聯乘推出了兩款本地製造、按他口味和要求釀製的自家品牌手工啤「花光青春」及「那算白過」:「『花光青春』係 IPA (Indian Pale Ale)嚟嘅,比較重啤酒花香味,酒體比較醇厚;而『那算白過』則是 Porter 黑啤,帶濃郁的咖啡豆味,我自己都有Keep住飲。」 CK 表示選擇 IPA 為開店頭炮主要因為其口味比較常見,大家更易接受,而他希望自己品牌最基本要有一濃一淡兩款口味,以供街坊選擇,所以黑啤「那算白過」自然就是不可或缺的產品。

至於酒名的源起,說來卻有些唏噓:「其實係當時辭任搬 Office 嘅時候,經常 Loop 住聽嘅係樂隊 Mr. 的《不屈》,酒名則取自當中兩句歌詞:『但卻花光青春//不屈地//夢到』及『曾經不屈//那算//白過』,其實一切都好隨心。」

「隨心」一詞乍聽似是無心插柳,但仔細咀嚼過後,或許正正潛藏著 CK 辭任當刻的心境。

「花光青春」 $45/支;「那算白過」 $45/支


自覺「離棄」街坊 港人需要抽離現實

「坦白講,面對辭任,我覺得個事實就係離棄咗班街坊,我自己都認為係。我成日同佢哋(關注組成員)傾,『其實係唔係可以再 Hold 耐啲呢?唔使咁快離開呢?』但係當時嚟睇,你唔知個後果會係點,或者你宜家望返轉頭,你緊係會覺得『係喎,可以做耐啲喎』,可能你未必會畀人 DQ 、唔會畀人罰錢,事實上呢個係嗰個氣氛底下最好嘅決定。」說起辭任, CK 至今仍念念不忘,忘不掉自己以往一直為之奮鬥的社區、街坊,但終歸化為一聲嘆息。

「唔係特別因為我冇做區議員先覺得同個社區疏離咗,我諗呢年零時間,係好多香港人都覺得成個社會陌生咗,我估我嘅感覺唔會比其他人更加強烈……」

CK 直言相比以前做區議員的時候,現時對社區事務的積極程度必然有所下降,「宜家嘅積極係諗點樣可以 Sustain 到成件事(指開『鬍鬚張』),好老實間舖 Setup 咗,其實回唔到本唔緊要㗎,起碼佢要係 Sustain 到。始終『做區』大部份資源都係政府畀,我唔使諗太多收支平衡問題,宜家要諗埋有多啲 Marketing ,呢層都係仲摸索緊。淨係希望唔好係兩年之後,『嘩!蝕到趴街』,跟住要執咗佢,如果唔係就好冇意義。」

講到 Marketing , CK 在店內特意設置的打卡位,亦算是一份小心思。

意義?「即係飲完酒喺呢個清醒同迷糊之間嘅狀態都幾奧妙,唔使諗咁多嘢,當然過份酗酒都係唔好啦,但係 Somehow 飲完酒,你又可以放鬆一下,可以有少少抽離現實嘅感覺。既然宜家個社會咁唔好嘅時候,咁大家咪放鬆一下囉。大家停一停,總會搵到個可以過得舒服嘅空間,『鬍鬚張』某程度上都係想香港人可以有個小小嘅空間去暫時抽離現實……」CK 大大啖呷過手中那瓶「那算白過」,似要將鬱憤盡數吞入腹中。

CK 直言店舖未來的動向尚處於構思階段,加上目前社會太多變數,唯有主力諗下店舖開張後「點樣企好」。
「鬍鬚張」的貨架上擺滿了各式各樣的手工啤(價錢由$32起), CK 估計至少有過百款口味。
吹啤啤 – 「板藍根」 $50/支
吹啤啤 – 「紅Van大佬」(Red Ale) $45/支
吹啤啤 – 「蘋果西打」 $45/支
吹啤啤 – 「傾城」(熱情果口味) $40/支
吹啤啤 – 「單眼佬」(話梅蜂蜜酒) $40/支