Pete（又名DJ Fabsabs）主理音樂單位「Cantomania」，專辦播放廣東歌的Canton Disco派對。他尷尬指，今年做過主流網台的訪問後，曾買咖啡也被認出：「店員話『你咪嗰個鬼佬DJ？』」Pete操流利廣東話，說疫後Canton Disco漸趨流行，現在搞手、觀眾愈來愈多：「未必周街嘅人都識Canton Disco，但會出去玩、愛音樂的人，就一定知！」

他在香港土生土長，年少時聽Cantopop學廣東話，「細個曾疑惑，我係鬼佬而非香港人？廣東歌令我localized到自己。」Canton Disco興起，他覺得與抓緊根源也有關。「近年香港失去好多嘢⋯⋯又很多人移民，我諗大家都想keep住香港文化同廣東話。」

文：凌梓鎏
圖：凌梓鎏、受訪者提供

時光倒流尋開心

連同Pete，Cantomania現有三位DJ和一位VJ（主理視覺效果的Visual Jockey）。Pete說，以往Cantomania在酒吧和夜店舉行派對，過去一年Canton Disco大熱，令他們有機會在更多地點出現，如參與M+博物館的活動、進駐中環人氣food court「BaseHall」。上月杜德偉開記招宣傳紅館演唱會，也請Cantomania到場打碟助興。

「杜德偉啲歌〈脫掉〉、〈信自己〉好正。」Pete還哼上幾句，散發「鬼佬愛廣東歌」的過癮vibe，難怪他為Canton Disco派對打碟時，「最多人問『點解你識呢啲歌』、『邊個俾個playlist你』，係我自己揀歌㗎。」Pete父母是外國人，他在香港出生、讀國際學校，「我想學多啲廣東話，中學便聽廣東歌，例如王菲、LMF。」去完英國讀大學，他回港生活仍情迷廣東歌：「每星期都同同事唱lunch K！」

約2010年起，Pete開始在酒吧做DJ，後來加入播廣東歌的Cantomania（2021年改由Pete主理）。「以前Canton Disco好小眾，八年前Cantomania啲party大概有40人，依家係成400人。」他覺得經歷疫情、壞時代以至現在經濟低迷，都造就這個熱潮。「疫下大家躲在家上網，那時Cantomania做好多live stream，儲咗啲fans。加上依家香港人好大壓力，個個都唔開心，自然想追返以前嘅快樂。」

廣東金曲是香港美好年華的產物，也是集體回憶。「好多人話，『聽你今晚播歌像時光倒流，帶返我去細個開心嘅日子』。」Pete回想踏入千禧年，「成個世界興緊rave party，香港都有好多跳舞歌，如陳慧琳〈花花宇宙〉、黎明〈Sugar In The Marmalade〉、郭富城〈Para Para Sakura〉 。」他打碟很有創意，歌庫不只Y2K與不同年代的廣東歌，「仲會播其他嘢，如DONKI主題曲、電視新聞《香港早晨》和廣告特輯《宣傳易》的主題音樂，甚至會mashup（混搭）日本、韓國歌。」

近年香港失去好多嘢⋯⋯又很多人移民，我諗大家都想keep住香港文化同廣東話。

Pete

在壞時代追尋跳舞音樂

除了Cantomania，還有不同單位和DJ，都愛辦Canton Disco派對。在Pete十多年的香港DJ生涯中，Canton Disco是否從未如此流行？「係㗎。現在每個月有成五至十個Canton Disco party，係好事，因為不同DJ有不同style。」他笑言，DJ當然會播自己喜歡的歌，「我都會，但我最有滿足感，係見到大家嚟party唱歌跳舞，可以得到多啲energy同motivation。有時睇見全場每個人，一齊好大聲唱晒成首歌，嘩，真係好開心！」

氣氛高漲的Canton Disco片段，在Threads廣轉開去，也是熱潮助力。唱舊歌開心，睇舊事又開心，回憶總是美好的？「英國、美國都有這個trend，例如時裝、音樂、設計，有很多Y2K元素。我覺得因為現時社會和social media，令生活變得太複雜。以前Y2K年代，我用Nokia手機，一切多簡單。」

而香港的複雜，港人自知。Pete簡而言之：「過去十年，香港人冇咗好多嘢，將來也不穩定，都唔知仲有冇人講廣東話？」他想起有位英國DJ談及跳舞音樂，「他說未來五年，全球有很多政治和經濟問題，俄羅斯、美國現已不穩，當大環境很差，大家會追尋開心的dance music，滲雜懷舊氛圍，同時凝聚到一個community。」

好多人話，聽你今晚播歌像時光倒流，帶返我去細個開心嘅日子。