香港人生活在美食天堂，每人心中都應該有幅美食路線圖，例如要掃街可以去旺角、葵廣，要去文青Cafe可以到深水埗、西營盤，要發掘小店瓹窿瓹罅，荃灣同元朗就啱晒你。不過，最近大角咀都開始多人入去「搵食」，皆因這兩年來有不少美食小店都選擇進駐區內。今次編輯部就為大家搜羅了5間大角咀美食小店，有英式甜品、日式小食、新派漢堡、地道泰菜等，究竟大角咀係咪真係能夠崛起，成為大家心中的美食新甘泉呢？
文：Coco
圖：Coco、@cr.eating_hk、相關店舖
① 英式甜品大變身 邪惡金寶脆脆｜crumbled.
食物除了要好食，現在亦講求相機都要覺得「好食」。2021年在英國曼徹斯特開業、今年年頭來到香港開分店的「crumbled.」，所售賣的特色甜品就夠哂IGable啦！Crumble其實是英國傳統甜品「蘋果金寶」上面的金寶脆脆，店家將它和吉士、水果、棉花糖等配料結合，變成店內所售賣的新派變奏金寶，樣子邪惡之餘亦甜到入心。
「crumbled.」總共有6款套餐，每款都有不同配料。例如Set A就是在金寶脆脆加上焦糖餅碎、粟米片、焦糖醬、吉士醬及黃桃等，黃桃的微酸中和了焦糖醬的甜膩，不會感到太滯胃，吉士醬以瀑布式淋上表面，夠晒邪惡。而Set F 則有雲呢拿雪糕、麻糬等，雪糕質地接近意大利雪糕；朱古力醬用針筒裝住，玩味重之餘亦可以因應自己口味調節。
包含Lotus焦糖餅、Lotus焦糖餅碎、七彩脆麥片、焦糖醬、彩針糖、黃桃、自家製吉士醬、招牌Crumble脆脆。
（圖片來源：@cr.eating_hk）
包含麻糬、朱古力醬、彩針糖、黃桃、雪糕、招牌Crumble脆脆。
（圖片來源：@cr.eating_hk）
（影片來源：@cr.eating_hk）
【crumbled.】
地址：大角咀鐵樹街7號金旺閣地舖
營業時間：1:30pm – 10:30pm
FB：Crumbled HK
IG：@crumbled_hk
② 漢堡新變奏 冬甩做鹹點｜Better Than Burger
漢堡變奏不止生酮，仲有冬甩！上年年中開業的美式漢堡店Better Than Burger，位於街坊自發活化的富多來商場。他們用冬甩代替漢堡包，夾住大啡菇、軟殼蟹等，加上棉花糖等新奇配料，有不少人都慕名而來，就連Youtuber文迪都有到場試食，讚賞他們的鹹甜漢堡。而他們最近亦有推出新搞作「芫荽青檸燒雞冬甩漢堡」，冬甩夾住一塊用芫荽和青檸烹製的燒雞扒，肉汁爆棚同時帶點清香。芫荽配冬甩，各位荽控係時候試下得唔得。
芫荽青檸燒雞冬甩漢堡 $72（+$18連薯條、汽水）
軟殼蟹冬甩漢堡 $88（牛油果+$12、每日限量30份）
（影片截圖：【大角咀掃街】7間人氣小店 邊間值得食？每日限量凍朱古力🤤 酥皮鯛魚燒有驚喜！吸收勁多澱粉質！🤤 文迪Mandic｜掃街）
【Better Than Burger】
地址：大角咀富多來商場2期地下11號舖
營業時間：11am – 9:30pm
FB：BTB – Better Than Burger
IG：@btb_hk
③ 餅皮都可以唔同味｜3 Crepes
日式可麗餅是其中一項港人熱愛的掃街小食，餡料多變，鹹甜皆宜。不過連餅皮都有不同口味的，你又食過未呢？同樣位於富多來商場的3 Crepes於上年甫開業，就憑其足料Crepe，深受各位甜食控喜愛。店內超過20款鹹甜口味，而最受歡迎之一就是連餅皮都用濃郁抹茶製作的「抹茶紅豆白玉可麗餅」。抹茶蛋皮包著白玉丸子和紅豆，再加上抹茶朱古力，未有得去京都也可先過過口癮。其他口味如焦糖吉士、士多啤梨香蕉亦各有捧場客。
抹茶紅豆白玉可麗餅 $48
士多啤梨香蕉配朱古力雪糕可麗餅 $55
【3 Crepes】
地址：大角咀富多來商場1期地下1號鋪
營業時間：12nn – 10pm
FB：3 CREPEs
IG：@3_crepes_hk
④ 九龍城人氣泰菜 進駐大角咀｜泰金國
良心小店泰金國本身在九龍城開業十多年，主理人是一對泰國夫婦，因為食物夠地道又高質，晚市經常大排長龍，在該區眾多泰國菜小店之中突圍而出。今年3月搬到大角咀後，菜式依舊有水準，如冬陰功肉碎湯河就是他們的招牌菜式之一，湯底濃郁，蕃茄味重，河粉亦十分掛汁，辣度如某米線連鎖店的三小辣，是重口味者必試之選。另推薦白焯獅蚶，剛剛熟的獅蚶保留了本身的鮮甜味，味道猶似有咬口的生蠔，蘸上酸辣汁同吃，不知不覺就吃完整盤！
【泰金國】
地址：大角咀道63號牡丹大廈北座地下9號舖
營業時間：12nn – 10pm
FB：泰金國
⑤ 酥皮鯛魚燒 芝士、蟹膏做餡料｜幸谷駅 さちやえき
鯛魚燒是日韓兩地的掃街小食，不過在香港就不算太常見。「幸谷駅 さちやえき」在上年於大角咀開業，除了製作日韓鯛魚燒常見的吉士、紅豆、抹茶等口味外，更推出酥皮鯛魚燒，餡料則有鹹牛肉芝士、明太子芝士竹輪、蟹柳蟹膏等鹹味。亦可以額外加配麻糬和芝士，餅皮鬆化，鹹香十足。同店亦有不同日式便當如牛肉壽喜燒便當、蒲燒鰻魚飯等。不過最近店主宣佈因人手不足，改為不定時營業，詳細記得留意社交平台公佈。
鯛魚燒烤得外皮香脆。
鯛魚燒常見的口味如吉士醬（$22）、紅豆（$22）等都有售。
【幸谷駅 さちやえき】
地址：大角咀角祥街20號地下D3號舖
營業時間：不定時營業（請留意社交平台最新公佈）
FB：幸谷駅 Cloud9 Station
IG：@cloud9stationhk
