正氣姐feature

煮場實測|3大小店即食餸包推介

【編按:AndThen.hk誠邀飲食達人「煮場正氣姐」出山,不定期在本網站為大家分享各種識飲識食好推介,保證獨家及真心。】

煮場正氣姐
FB專頁 煮場新聞 主理人,典型金牛「知識 L」(姐是知慳識儉啊!),從小食慣好東西,擁有黃金舌頭兼豐富飲食知識,日日扭盡六壬確保食得好、食出最高性價比,最憎呃神騙鬼飲食界敗類。

一個疫情令人人變成廚神,朋友日日 show off 屋企變成專業麵包舖、中西意法日菜式日日輪流煮。但人人入廚,你估真係人人識煮咩?身邊總有一兩個地獄廚神破極都未破到地獄,仲日日煮暗黑料理。所以我煮場正氣姐決定繼續拯救萬民,將各位等侍破地獄的弟兄姐妹救回人間。今次我會為大家介紹我親自食過的即食餸包,保證勁過銀針,一試便知龍與鳳。即食餸包勁之處是只要用熱水浸袋餸15-20分鐘便可以開餐,手殘都可以變達人! 

文:煮場正氣姐 
圖:煮場正氣姐 、相關網店

1| 高質粵式私房菜|【煮宮】

 【賣點】
高質粵菜價錢合理,鮑汁款式猶為出色。

一次過訂了12包即食餸包,餸菜的份量比我想像中豐富

人氣私房菜粵式抵食餸包 

煮宮開了短短兩年,已成為觀塘區內人氣粵式私房菜。筆者多次訂晚市也得等上數星期。我因他們的足料燉湯加香蒜蒸飯午餐而成為熟客,花膠螺頭湯配荷葉蒸蜆或蒸鱔飯香味四射,次次都被我肚皮秒殺。晚市私房菜不但有套餐預訂更可度身設計,我與一班海鮮迷朋友嚐後都大叫encore,完全明白爆場原因,亦甘願繼續等。

煮宮的即食餸包我會形容為「大件夾抵食」,價錢由$50-$168,所有燉湯則均一價$50 。$68小菜當中我試過柱侯荔芋鴨、鮑汁花生雞腳腩肉、黑豆花生炆豬手、蘿蔔牛肋條,全部都是火喉菜式,在家炆煮也要計算食材爐火錢吧!如此份量與品質只收$68是堅抵。貴少少的菜式亦試了酒醉系列,醉蝦肉爽鮮甜,推介!但我最喜歡的是花膠冬菇炆鴨掌($128),鮑汁很能送飯,花菇夠爽厚,鴨掌炆得夠火喉,已一再入貨!

午餐我通常煮意粉或麵條再加個餸包(上),晚餐就可以煮少個餸加碟菜搞掂一餐(下)

【總評】

  • 特色推介:清酒醉鮮蝦($128)、 花膠冬菇炆鴨掌($128)、鮑汁花生雞腳腩肉($68) 
  • 燒錢指數:4 粒星
  • 抵讚位:送貨準時無融雪情況
  • 有待改善位:訂購只能從Facebook或WhatsApp索取即食餸包餐單,自行填寫訂購項目再WhatsApp訂購。建議可用免費Google form 或為菜式加編號,讓客人更易訂購。
  • 客服表現:回覆速度算可以,因為小店始終人手有限 
  • 運費比較:滿$350免費送貨,約3天內送貨 
  • 自行取貨:未滿$350需自行到觀塘店舖取貨 (觀塘開源道60號駱駝漆大廈三期7樓S室)
  • 訂購方法:Whatsapp: 63525748
  • 價錢:$50-$168
  • 存放:冰格(-18度)存放一星期 

【煮宮】

FB:bit.ly/2ZXIqTt
IG:instagram.com/palacekitchenhk

(2) 第一代茶餐廳後人|【港優糧】

 【賣點】
元朗自家有機農場炮製真正香港味道,煙燻雞水準之作。

自家農場炮製地道風味

港優糧的即食餸包才剛剛正式推出市場已獲多個網上平台羅致,成為人氣產品。雖說這個品牌才剛成立,但背後的主理人卻是來自飲食世家。家族的茶餐廳於50年代開業,是香港第一代茶餐廳之一。當時港式西餐室開始為平民帶來西式口味,開展港式localized西餐的熱潮。港優糧的即食餸包都是每星期鮮製,而因為蔬菜都來自自家有機農場,部份餸包亦會按時令改變。如天氣太熱番茄不合時,有機蕃茄西班牙肉醬($58)便會漸漸淡出,由本地粟米西班牙肉粒醬($58)頂上。

港優糧推出的都是香港人口味,show me your love 都有,唔知幾時出男人的浪漫呢?

我一家人都鍾意他們的茶香煙燻雞系列,有半隻雞($158)及4隻兩節雞翼($58)。煙燻雞制作繁複,先滷後燻,要取得豉油、茶香及煙燻味道的平衡才算好功力。雞翼他們選用了日本的無激素雞翼,做得相當嫩滑連雞翼尖也啖啖肉。嚐辣的必食秘研椒香麻辣金錢肚($58)及微辣的香濃咖喱牛筋腩($78)。香滷美國牛腱好適合多放冰箱,隨時做小食。

自己加塊煎雞扒配搭即食有機蕃茄西班牙肉醬就成了豐富的午餐(左上)

【總評】

  • 特色推介: 慢煮古法太爺雞($158)、茶燻日本雞翼($58)、秘研椒香麻辣金錢肚($58)、香滷美國牛腱($58) 
  • 燒錢指數:3 粒星
  • 抵讚位:訂購即食餸包可同時購買元朗有機蔬菜非常方便
  • 有待改善位:目前款式較少
  • 客服表現:都算自動化及清晰,不太需要聯絡客服人員
  • 運費比較:滿$300免費送貨。香港島逢星期二、四送貨;新界北、新界東、九龍東、九龍中逢星期三及五送貨
  • 自行取貨:可到農場自取(牛潭尾路, DD 104, Lot 968, 元朗)
  • 訂購方法newageorganicfarm.oddle.me/zh_HK/
  • 價錢:$58-$158
  • 存放:存放於冰格(-18度)內冷凍,可放半年

FB:facebook.com/urbanlicious.hk
IG:instagram.com/urbanlicious.hk

3| 藍帶食材控私房料理|【五味匣子】

 【賣點】
女廚靚料用心之作,中西亞洲風烹調雞、魚、豬、牛菜式

包裝企理得深女性客歡心

喪揈花螺新鮮烏頭全靚食材

正氣姐同所有香港人一樣至愛海鮮,但人又懶點都無可能自己去好遠買。有次朋友介紹五味匣子,我即刻上Facebook望下,點知睇到我隔離果個同我一齊嘩嘩聲:「嘩!揈得好行呀」。好少見花螺那條肉「喪揈」,原來店主會去香港仔漁市場入貨,所以較一般經過幾轉車去到街市的貨新鮮好多。

另外更值得推介是元朗潮式黃油凍烏頭($128),從元朗楊氏水產取貨,又是新鮮到不得了,火喉剛好魚肉嫩滑。除了海鮮,其他食材也相當講究,雞的菜式會用無激素走地雞,食得安心。朋友試了台式香菇肉燥,送飯一流,我就會用來炒新竹米粉;另外,手撕雞和醉香花螺也深得家中長者歡心,凍食也一流。

五味匣子不時會有快閃菜式限量推出,如今期的「泰美味Monday 」只有10份,包括泰式烤雞配燒鷄醬、薄荷醬及泰式香茅、6頭南非醉鮑魚2隻($438)。另有需要4天前預訂的窩物系列,包括半隻或全隻雞及兩隻或四隻南非六頭鮑魚(二人份$380及四人份$580),所以困在家悶悶地想食豪D,可以留意豪華餐的推出。

醉花螺鮮味一流、肉質爽嫰(右上)。凍烏頭較市面其他即食凍烏頭出色(左下)。

2️⃣5️⃣斤生猛花螺由 #香港仔漁市場 送往workshop 中🚛🚛🚛💨💨💨你鍾意 #辣酒煮花螺 🌶定 #醉香花螺🥃? 上網落單訂購表格詳情👇🏻:📍WhatsApp 查詢:…

五味匣子發佈於 2020年7月22日星期三
店家在fb展示「喪揈」的花螺,保證貨源新鮮。

【總評】

  • 特色推介: 元朗黃油潮式凍烏頭($128)、醉香花螺($88)、法國吊掛式煙燻三文魚($78)
  • 燒錢指數:5 粒星
  • 抵讚位:中式西式至燉湯都有,更可加$40配搭即日新鮮蔬菜
  • 有待改善位:菜式份量較小,一家人可能要預多幾個餸才足夠
  • 客服表現:回應快速、態度良好
  • 運費比較:觀塘、牛頭角、九龍灣三區,滿$400免運費,未滿$400,加$40 ;其他區域滿$600免運費,未滿加$60。偏遠地區收$80附加費
  • 自行取貨:觀塘海濱中心6樓601室(牛頭角港鐡站B6出口)
  • 訂購方法https://bit.ly/30DHD9i
  • 價錢:$58-$180 
  • 存放:冰格(-18度)可保存一個月

FB:facebook.com/5flavoursbox/

正氣姐貼士:即食餸包最佳處理手法

大部份即食餸包通常都教大家浸熱水15-20分鐘便可食用,我自己經驗之談是最好先把餸包早一晚從冰箱轉移到雪櫃層,先慢速解凍,到需要食用時浸熱水,出來的溫度會較適合。

有時急住要開飯,我就會成舊冰連餸放入鑊明火煮融佢,呢個方法最快,亦都必定夠熱,但要小心有些小菜是煮到火喉剛好,再大火煮就會過熟。到時唔好話人地煮得唔好食,係自己抵死。

大家如果試到表現出色的同路小店,歡迎 PM 我煮場正氣姐: 煮場新聞 Cook News