話說我報咗一個興趣班——至於係咩興趣班，唔好理，反正你知嚟無謂，班中人見我公開發表卻會嬲豬——最後一課，老師忽然興起，點評一位在場學生（舊生來的，比較熟，就點評），結果，嗰位同學勁嬲，不停反駁，駁駁下，嬲到……執嘢走！
我唔知頭唔知路，就覺得，冇咩嘅，老師在乎一位學生，學生在乎他人看法，就係咁簡單。身處課室現場嘅我，冇咩心情聽細節，主要喺度諗：我嘅作品可以點進步呢？佢哋話買嗰本參考書，唔用淘寶可以點樣得到？諸如此類。
殊不知，該舊生憤然離場後，同學私語喎！我滿心疑惑：下？乜唔係老師與其中一位舊生嘅紛爭咩？點解其他人好似知道內幕？我就問：「你哋全部人……係咪好熟㗎？」同學就提及興趣班WhatsApp group chat，該位舊生平日在group chat的發言如何如何。
係喎，我不在WhatsApp group 之內。
點解呢？因為我根本就冇WhatsApp（半年前把心一橫刪app），興趣班上左一季，我從冇接收過課室以外嘅任何消息。
然後同學話：你唔喺個group，所以唔知！
我當時諗，頂，好彩我不在群組之內。
老老實實，我成世人最憎嘅就係gossip流言蜚語，誰誰誰咩咩咩，阿邊個又點點點……唉，真係唔想知——社會唔係咁樣教育嘅，社會一直向我哋暗示gossip嘅重要性：Gossip係資訊，你講錯嘢、表錯情、入錯貨，就係因為缺乏資訊，唔知內情——但我覺得，gossip偏偏就係阻你前途嘅事物，令你唔專心，唔一致，唔勇猛。谷德昭同我講過一番好好嘅經驗之談：「知道A嬲B，你就唔敢喺A面前提B，但機會到，A會同B合作，你好驚訝；呢個世界冇一世敵人，可惜你已經少咗一個機會。」
猶記住當時聽呢番說話，我在想：Gossip好危險！人人以為知道gossip就可以脫險，其實仲煩惱。
煩惱俗事，足夠消費一個人嘅心志。
多謝WhatsApp，因為冇咗你，我避一劫。花少好多心血去接收、分析、評價誰誰誰；我比較關心自己如何進步。
少一個是非場，會比較容易記住自己嘅初心。到最後，報個班，做個人，係為咩？豈不正正就係為「Enjoy個世界」？
我好鍾意人生，好鍾意知識。抱歉，世間多少負能量，係阻唔到我。
因為我死過；死過的人最清楚。什麼係重要，什麼係珍貴。
八月尾，親口講Sound Of Silence，藝術中心見！Enjoy！
